สวิตกฺกสวิจารปจฺฉิมจิตฺตสฺส ภงฺคกฺขเณ อวิตกฺกอวิจารปจฺฉิมจิตฺตสมงฺคีนํ ยสฺส จิตฺตสฺส อนนฺตรา อวิตกฺกอวิจารํ ปจฺฉิมจิตฺตํ อุปฺปชฺชิสฺสติ เตสํ กายสงฺขาโร อุปฺปชฺชิตฺถ, โน จ เตสํ วจีสงฺขาโร นิรุชฺฌิสฺสติฯ อิตเรสํ เตสํ กายสงฺขาโร จ อุปฺปชฺชิตฺถ วจีสงฺขาโร จ นิรุชฺฌิสฺสติฯ

(ข) ยสฺส วา ปน วจีสงฺขาโร นิรุชฺฌิสฺสติ ตสฺส กายสงฺขาโร อุปฺปชฺชิตฺถาติ? อามนฺตาฯ

(ก) ยสฺส กายสงฺขาโร อุปฺปชฺชิตฺถ ตสฺส จิตฺตสงฺขาโร นิรุชฺฌิสฺสตีติ?

ปจฺฉิมจิตฺตสฺส ภงฺคกฺขเณ เตสํ กายสงฺขาโร อุปฺปชฺชิตฺถ, โน จ เตสํ จิตฺตสงฺขาโร นิรุชฺฌิสฺสติฯ อิตเรสํ เตสํ กายสงฺขาโร จ อุปฺปชฺชิตฺถ จิตฺตสงฺขาโร จ นิรุชฺฌิสฺสติฯ

(ข) ยสฺส วา ปน จิตฺตสงฺขาโร นิรุชฺฌิสฺสติ ตสฺส กายสงฺขาโร อุปฺปชฺชิตฺถาติ? อามนฺตาฯ

(ยถา นิโรธวาเร อตีตานาคตา ปุจฺฉา อนุโลมมฺปิ ปจฺจนีกมฺปิ เอวํ อุปฺปาทนิโรธวาเรปิ อตีตานาคตา ปุจฺฉา อนุโลมมฺปิ ปจฺจนีกมฺปิ วิภชิตพฺพํ อสมฺโมหนฺเตน นิโรธวาเรน สทิสํ, นตฺถิ นานากรณํฯ)

อุปฺปาทนิโรธวาโรฯ

3. ปริญฺญาวาโร

1-6. ปจฺจุปฺปนฺนวาราทิ

[159] (ก) โย กายสงฺขารํ ปริชานาติ โส วจีสงฺขารํ ปริชานาตีติ? อามนฺตาฯ

(ข) โย วา ปน วจีสงฺขารํ ปริชานาติ โส กายสงฺขารํ ปริชานาตีติ? อามนฺตาฯ

(ยถา ขนฺธยมเก ปริญฺญาวารํ วิภตฺตํ เอวํ สงฺขารยมเกปิ ปริญฺญาวารํ วิภชิตพฺพํฯ)

ปริญฺญาวาโรฯ

สงฺขารยมกํ นิฏฺฐิตํฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

7. อนุสยยมกํ

[1] สตฺตานุสยา – กามราคานุสโย, ปฏิฆานุสโย, มานานุสโย, ทิฏฺฐานุสโย, วิจิกิจฺฉานุสโย, ภวราคานุสโย, อวิชฺชานุสโยฯ

1. อุปฺปตฺติฏฺฐานวาโร

[2] กตฺถ กามราคานุสโย อนุเสติ? กามธาตุยา ทฺวีสุ เวทนาสุ เอตฺถ กามราคานุสโย อนุเสติฯ

กตฺถ ปฏิฆานุสโย อนุเสติ? ทุกฺขาย เวทนาย เอตฺถ ปฏิฆานุสโย อนุเสติฯ

กตฺถ มานานุสโย อนุเสติ? กามธาตุยา ทฺวีสุ เวทนาสุ รูปธาตุยา อรูปธาตุยา เอตฺถ มานานุสโย อนุเสติฯ

กตฺถ ทิฏฺฐานุสโย อนุเสติ? สพฺพสกฺกายปริยาปนฺเนสุ ธมฺเมสุ เอตฺถ ทิฏฺฐานุสโย อนุเสติฯ

กตฺถ วิจิกิจฺฉานุสโย อนุเสติ? สพฺพสกฺกายปริยาปนฺเนสุ ธมฺเมสุ เอตฺถ วิจิกิจฺฉานุสโย อนุเสติฯ

กตฺถ ภวราคานุสโย อนุเสติ? รูปธาตุยา อรูปธาตุยา เอตฺถ ภวราคานุสโย อนุเสติฯ

กตฺถ อวิชฺชานุสโย อนุเสติ? สพฺพสกฺกายปริยาปนฺเนสุ ธมฺเมสุ เอตฺถ อวิชฺชานุสโย อนุเสติฯ

อุปฺปตฺติฏฺฐานวาโรฯ

2. มหาวาโร 1. อนุสยวาโร